Britaniya alimləri döş xərçəngi şişlərini kiçildən "Capivasertib" adlı yeni dərman hazırlayıblar.

Aztibb.az medimagazin.com.tr-yə istinadla xəbər verir ki, mütəxəssislər hər il milyonlarla insanın həyatını xilas edə biləcək bu dərmanın döş xərçənginin müalicəsində dönüş nöqtəsi olduğunu deyiblər. Tədqiqatçılar dərmanın xərçəngə səbəb olan protein molekulu AKT-nin fəaliyyətini blokladığını vurğulayıblar. 

İngiltərənin paytaxtı Londondakı Xərçəng Araşdırma İnstitutunda (ICR) araşdırmalardan sonra "Capivasertib" dərmanı "AstraZeneca" şirkəti tərəfindən istehsal edilib. Bu zaman ABŞ-ın San Antonio Döş Xərçəngi Simpoziumunda dərmanın üçüncü mərhələ klinik sınaqlarının uğurlu nəticələri də əsas götürülüb. 

"Capivasertib"-nin şişləri kiçildə biləcəyi və döş xərçəngini əvvəlki dərmanlardan iki dəfə daha uzun müddətə dayandıra biləcəyi qeyd edilib.

Qeyd edək ki, Ümumdünya Səhiyyə Təşkilatının son məlumatlarına görə, 2020-ci ildə dünyada təxminən 2,5 milyon qadına döş xərçəngi diaqnozu qoyulub. Eyni zamanda, xəstəlik həmin il təxminən 687 min insanın ölümünə səbəb olub.