Zaqatala Rayon Mərkəzi Xəstəxanasının tibbi heyəti tərəfindən rayon məktəblərində mütəmadi olaraq uşaqların icbari dispanserizasiyası, narkomaniya və digər zərərli vərdişlərə qarşı maarifləndirici tədbirlər həyata keçirilir.

Rayon Xəstəxanasından Aztibb.az-a verilən məlumata görə, ötən həftə Şıxəli Qurbanov adına 3 saylı tam orta məktəbdə şagirdlərin icbari dispanserizasiyası həyata keçirilib və şagirdlər onları narahat edən məsələləri həkimlərlə bölüşüblər.

Bundan əlavə, məktəbin akt zalında narkomaniya və digər zərərli vərdişlərə qarşı maarifləndirici tədbir təşkil olunub.

Tədbirin keçirilməsində əsas məqsəd, şagirdləri narkomaniya və digər zərərli vərdişlərin fəsadları, cəmiyyətdə yaratdığı sosial bəlalar barədə məlumatlandırmaq, insanların sağlamlığına vurduğu ziyanlarla bağlı məktəblilər arasında təbliğat aparmaq, onları belə neqativ əməllərdən çəkindirmək və məktəblilərin təhsilə, elmə, idmana olan marağını artırmaqdan ibarətdir.

Maarifləndirici tədbirlərdə gənclərə zərərli vərdişlərdən uzaq olmaq və həmin sosial bəlaya qarşı mübarizə aparmaq üçün tövsiyyələr verilir. Həmçinin narkomaniya və digər zərərli vərdişlərin fəsadlarına dair ədəbi-bədii kompozisiyalar təqdim edilib, videoçarxlar nümayiş olunub.