Bir il əvvəl Elmi Cərrahiyyə Mərkəzinə müraciət edən xəstəyə mədənin pilorik hissəsini və 12 barmaq bağırsağın soğanağını əhatə edən, mədənin dekompensator stenozuna səbəb olan törəməni çıxarmaq mümkün olmadığından qastro-entero anastamoz və Braun tipli anastomoz qoyulmuşdu. Böyük piylik çıxarılmış, üzərində olan limfa düyünlərində metastatik adenokarsinoma təsdiq olunmuşdu. 

Aztibb.az xəbər verir ki, bu barədə Akademik M.A.Topçubaşov adına Elmi Cərrahiyyə Mərkəzinin Qaraciyər, ödkisəsi və mədəaltı vəzi xəstəliklərinin cərrahlığı şöbəsinin baş elmi işçisi, tibb elmləri doktoru, professor Zərraf Şirinov məlumat verib.

Həkim bildirib ki, bir il müddətində xəstəyə 12 dəfə kimyaterapiya seansı aparılmışdır. Daha sonra aparılan KT müayinəsində törəmənin 7,0 sm ölçüdən kiçilərək 4,0 sm olduğu müşahidə olunmuşdur: "Ətraf toxumalarda və parenximatoz orqanlarda Mts. olmaması bizdə törəmənin operabel olacağına ümid yaratdı. Əməliyyat uğurlu oldu, qastroentero anastomoz ləğv olunmaqla subtotal distal qastrektomiya və limfodisseksiya icra etmək mümkün oldu".

Zərraf Şirinov qeyd edib ki, xəstə kafi vəziyyətdə evə yola salınıb. Həyatından və işindən məmnundur.