Tərtər Rayon Mərkəzi Xəstəxanasının əməkdaşları Vətənimizin ərazi bütövlüyü uğrunda canından keçmiş Əliyev Qabil Cəmil oğlu və Məmmədov Mehdi Elçin oğlunun ailəsinə baş çəkiblər.
Aztibb.az-a Xəstəxanadan verilən məlumata görə, əməkdaşlar onlarla həmsöhbət olub, mənəvi dəstəklərini ifadə ediblər.
Görüşlər zamanı şəhidlərimizin müqəddəs amal uğrunda canlarından keçdiyini və daim onların hünərinin Azərbaycan xalqının yaddaşında yaşayacağı qeyd edilib. Şəhidlərimiz Qabil və Mehdinin qəhrəmanlıqla dolu döyüş yolları xatırlanıb, göstərdikləri igidlikdən bəhs olunub.
Şəhidlərimizin ailə üzvləri onlara göstərilən diqqət və qayğıya görə başda direktor olmaqla xəstəxana əməkdaşlarına minnətdarlığını bildiriblər.
Xatırladaq ki, Mehdi Məmmədov 4 oktyabr 2020-ci ildə Suqovuşan kəndi istiqamətində döyüş tapşırığının yerinə yetirilməsi zamanı həlak olmuşdur. Qabil Əliyev isə 22 aprel 1994-cü ildə Ağdamın Güllücə və Şotlanlı kəndləri uğrundə gedən döyüşlər zamanı şəhid olmuşdur.
Allah şəhidlərimizə rəhmət eləsin!