Həkimlik sənətinin özünəməxsus bir sıra qanun-qaydaları vardır. Həkim öz davranışı, şəxsiyyəti, təfəkkürü, dünyagörüşü və insanlarla münasibəti ilə başqalarından fərqlənməli, özünə inam yaratmağı bacarmalıdır. Bütün bunlar həkimlik etikasının əsasını təşkil edir. Əsl həkim hərtərəfli hazırlıqlı, yaradıcı təfəkkürlü, dövrünün tələbləri səviyyəsində durmağı bacaran, sadə, alicənab, müdrik, xeyirxah və işgüzar xarakterə malik olmalıdır.

 

Bu gün Aztibb.az-ın "Həkimlərimizi tanıyaq!" rubrikasında bəhs edəcəyimiz Elçin Sabir oğlu Kərimov da belə təbiblərimizdəndir.

 

O, 12 may 1978-ci ildə Salyan şəhərində anadan olub. 1995-2001-ci illərdə N.Nərimanov adına Azərbaycan Dövlət Tibb Universitetinin Müalicə-proflikatikası fakültəsində təhsil alıb. 2001-2002-ci illərdə Salyan şəhər 3 nömrəli klinik xəstəxanasında cərrahiyyə üzrə internatura keçib.

 

Elçin Kərimov 2002-ci ildə Salyan Rayon Mərkəzi Xəstəxanasının Cərrahiyyə şöbəsində həkim-cərrah kimi əmək fəaliyyətinə başlayıb. 2005-ci ildən 2007-ci ilə qədər Sankt-Peterburq şəhərində diplomdan sonra cərrahiyyə üzrə ordinaturanı bitirərək aspiranturaya daxil olub.

 

Cərrah həkimin Rusiya Federasiyasının müxtəlif elmi jurnallarında elmi məqaləri və tezisləri dərc olunub. O, 2008-ci ildən Şirvan Müalicə Diaqnostika Mərkəzinin Cərrahiyyə şöbəsinə cərrah kimi işə qəbul olunub. Hazırda Şirvan Müalicə Diaqnostika Mərkəzinin Cərrahiyyə şöbəsinin müdiri vəzifəsində çalışır.