Avstraliya və İngiltərə alimləri müəyyən ediblər ki, "bayquşlar" bir neçə sadə addımla öz sirkad ritmlərini - bədənlərinin bioloji saatlarını dəyişib sağlamlıqlarını və ovqatlarını yaxşılaşdıra bilərlər.

Onlar gecə 12-dən sonra yuxuya gedib səhərlər gec oyanan insanların - "bayquşların" həyat tərzini araşdırıblar. Məlum olub ki, hər gün eyni vaxtda yatmaq, kofeindən imtina etmək və səhərlər günəş şüası qəbul etməklə sirkad ritmini dəyişmək mümkündür.

Yalnız səhərlər fiziki hərəkətlər etmək lazımdır. Hər gün eyni vaxtda nahar etmək və 19:00-dan sonra heç nə yeməmək, 15:00-dan sonra kofein qəbul etməmək    məsləhətdir.

Həmişəkindən 2-3 saat tez yatağa uzanmaq və axşamlar işıqlandırmanı azaltmaq da yuxu rejiminə kömək edir.

Araşdırmaçılar deyirlər ki, bunlar adi şeylər kimi görünə bilər, amma əməl edilərsə, çox sayda insana fayda verə bilər.

İnsan orqanizminin bioloji saatı günəşin çıxmasına və batmasına uyğun qurulub, bizim gecələr yatmağımız bununla bağlıdır.