Zaqatala Rayon Mərkəzi Xəstəxanasında hamilələr üçün maarifləndirici tədbir keçirilib.

Xəstəxanadan Aztibb.az-a bildirilib ki, tədbirdə ASM şöbəsinin ailə həkimi, mama-ginekoloq Dostu Qaraəhmədova Dostu “Hamilələrin sağlam qidalanması” haqqında məlumat verib. O, düzgün qidalanmanın hamiləliyin erkən dövründə daha vacib olduğunu, hamilələrin qida rasionunda fol turşusu, kalsium, fosfor, sink, dəmir, B, C, E vitaminləri ilə zəngin qida məhsullarının olmasını xüsusi vurğulayıb.

Bundan əlavə, yoqurt, qatıq, xama, qaymaq, yağsız ət, tərəvəz, meyvələr, kərə yağı, süd məhsulları, yarmalar, yumurta, quru meyvələr, balıq, təzə göyərti, çovdar çörəyi və s. qidaların qəbulunun faydalarından danışılıb.

Tədbirin sonunda “Hamilələrin sağlam qidalanması” haqqında slayd nümayiş etdirilib. Həkim ona ünvanlanan sualları ətraflı cavablandırıb.