1-2 dekabr 2022-ci il tarixlərində K.Y.Fərəcova adına Elmi-Tədqiqat Pediatriya İnstitutunda “Neonatal Reanimasiya Proqramı” (NRP) kursu keçirilib.

İnstitutdan Aztibb.az-a bildirilib ki, tədbirdə müəssisənin direktoru t.ü.f.d., dos. Allahverdi Musayevin ölkənin doğuşayardım müəssisələrində çalışan tibb mütəxəssisləri üçün nəzərdə tutulan kursun zəruri bir təlim olduğunu diqqətə çatdırıb. O, neonatal ölümlərin qarşısının alınmasına töhfə vermək üçün belə təlimlərin keçirilməsinin vacibliyini vurğulayıb.

Təlimdə mütəxəssislər tərəfindən yenidoğulmuşların reanimasiyasında istifadə edilən yeni texnologiyaların, eyni zamanda təcili və təxirəsalınmaz halların profilaktikası, erkən diaqnostikası və müalicəsinə dair ən müasir məlumatların kurs iştirakçılarına çatdırılacağını bildirib.

Kursun ilk gününün birinci hissəsində təlimçilər – Aydan Şahbazzadə, uzman pediatr Elşad Şıxəliyev, reanimatoloq Xalidə Mustafayeva, ikinci hissədə t.ü.f.d.Sevda Əsədova, uzman pediatr Nərmin Quluzadə, reanimatoloq Afət Ağayeva iştirakçılara NRP kurs proqramına əsasən nəzəri bilikləri və praktiki bacarıqları təqdim ediblər.

Təlimin son günündə təlimçilər – Lamiyə Fərzəliyeva, Dünya Hüseynova, Aynur Bağırova iştirakçılara NRP kurs proqramına əsasən təqdimatla çıxış edib, praktiki bacarıqları təqdim ediblər.

2 gün davam edən təlimdə tibb işçiləri, neonatoloq, mama-ginekoloq və tibb bacıları iştirak ediblər.

Sonda təlim proqramını müvəffəqiyyətlə bitirən kurs iştirakçılarına sertifikatlar təqdim olunub.