Ailə həkimləri keçmiş sahə həkimləri və sahə pediatırlarıdır. Ailə həkiminə müraciət edən vətəndaşlara hazırda daha geniş sahədə və təmənnasız xidmət göstərilir. Həkim xəstəni ilkin müayinə edir, diaqnoz qoyaraq lazım olan müayinələrə göndərir və ehtiyac yarandıqda pasiyenti məhdud ixtisas həkimlərinə yönəldir. Həmçinin müayinə və müalicəsini nəzarətdə saxlayır.

Aztibb.az xəbər verir ki, bunu Mingəçevir Şəhər Mərkəzi Xəstəxanasının 1 saylı Ailə Sağlamlıq Mərkəzinin həkimi Kifayət Həsənova bildirib.

Onun sözlərinə görə, ailə həkiminin əsas vəzifəsi xəstəliyin profilaktikası ilə məşğul olmaq, aşkar etdiyi xroniki xəstəliyi dispanser nəzarətdə saxlamaqdır. Ailə həkimi aşkar etdiyi xəstəlik haqqında xəstəni məlumatlandırır, sağalması üçün lazımi məsləhətlətlərini verir:

"Məlumdur ki, yüksək təzyiqi olan xəstə pəhriz gözləmirsə, zərərli vərdişlərini tərgitmirsə həkimin təyin etdiyi müalicə müsbət effekt verməz. Bu səbəbdən bir həkim kimi deyil ailə dostu kimi pasiyentlərlə sıx əlaqələr yaradılır, tövsiyyələr verilir".

Kifayət Həsənova qeyd edib ki, ailə həkimləri sahəsindəki ailələri yaxından tanıyan bir təbib kimi pasiyentlərin irsi xəstəliklərinin gedişini, ağırlaşmasını xəstələrə izah edir, doğulan uşaqlarda da irsi patologiya ola biləcəyini bildirir. Ailə həkimləri sahəsindəki hamilə qadınları nəzarətə götürərək, müayinə və müalicəsində ginekoloqlarla birlikdə yaxından iştirak edir, risk qrupuna daxil olan hamilələrə xüsusi diqqət göstərirlər.

"Ailə həkimləri I qrup və ağır yataq xəstələrini ASM-nin xidməti maşını ilə evlərdə yoxlayır, lazım gələrsə digər ixtisas həkimlərini də müayinəyə cəlb edirlər.
Bütün dünyada COVID-19 pandemiyasının yayıldığı zamanda ailə həkimləri də gərgin işlədi. Virus infeksiyasının profilaktikası ilə yanaşı əhalinin vaksinasiyaya cəlb olunmasında yaxından iştirak etdi,
Hazırda vətəndaşlar ailə həkiminə müraciət etmədən sərbəst şəkildə dar ixtisas həkimlərinə müraciət edə bilirlər. Bu, xəstələri müəyyən vaxt itkisindən azad edir. Lakin vətəndaşlar xəstəliyinin gedişatına nisbətdə düzgün seçim etmədiyi üçün müxtəlif həkimlərin qəbulunda olmaq məcburiyyətində qalırlar. Yaxşı olar ki, şəhər qeydiyyatında olan insanlar əvvəllər olduğu kimi ilk olaraq ailə həkiminin xidmətində olsun", - deyə o, bildirib.

Müəllif: Səadət Məmmədova