Mövsümün dəyişməsi, havaların soyuması ilə əlaqədar uşaqlar arasında virus infeksiyalarının törətdiyi xəstəliklərdə artım müşahidə olunur. Xəstəliklər arasında daha çox yayılan bronxit və bronxiolitlərdir.

Aztibb.az xəbər verir ki, bu barədə Mingəçevir ŞMX-nın Uşaq şöbəsinin həkim pediatrı Könül Zeynalova məlumat verib.

Həkim bildirib ki, bronxitlər daha çox yuxarı yaş qrupu uşaqlarda, bronxiolitlər isə kiçik yaş qrupu uşaqlar arasında rast gəlinir. Bu gün pediatrlara edilən müraciətlərin əsasını bronxiolit xəstəliyinə tutulmuş körpələrin vəziyyətinin ağırlaşması təşkil edir. 

Onun sözlərinə görə, nronxiolitlərin əsas törədicisi daha çox Respirator Sinsitial Virusudur. Xəstəliyin əsas əlamətləri burun tıxanıqlığı, körpələrdə tənəffüsün çətinləşməsi, qidalanarkən və yatarkən boğulma ilə müşaiyət olunan öskürək, sinədə davamlı xışıltının olması, xəstəlik irəlilədikcə hərarətin yüksəlməsi, halsızlıq və iştahın pozulmasının müşahidə olunmasıdır.

"Əgər körpələrdə bu əlamətlər müşahidə edilərsə təcili sürətdə pediatrla əlaqə saxlamaq lazımdır. Vaxtında həkimə müraciət xəstəliyə yoluxmuş körpənin vəziyyətinin ağırlaşmasından xilas edir. Ən əsası isə uşaqlar peyvənd olunmalıdır. Çünki vaxtlı vaxtında olunan peyvəndlər uşaqları bu kimi xəstəliklərdən qoruyur. Həmçinin peyvənd olunmuş uşaqlar xəstəliyi daha asan keçirir, daha tez sağalırlar.
Əziz valideynlər, infeksiyalara yoluxmuş övladlarınıza qarşı daha diqqətli olun və onların vəziyyəti ağırlaşdırmadan pediatra müraciət edin", - deyə Könül Zeynalova qeyd edib.

Müəllif: Zamiq İbrahimov