Zərdabda Rayon İcra Hakimiyyətinin və İcbari Tibbi Sığorta üzrə Dövlət Agentliyinin Göyçay rayon filialının təşkilatçılığı ilə “İcbari tibbi sığorta” mövzusunda maarifləndirici tədbir keçirilib.

Heydər Əliyev Mərkəzində təşkil olunan tədbirdə rayon icra hakimiyyətinin məsul işçisi Tural Nağıyev, filialın direktoru Faiq Abdullayev, rayon ərazisində fəaliyyət göstərən idarə, müəssisə və təşkilatların işçiləri iştirak ediblər.

Azərbaycanın suverenliyi, ərazi bütövlüyü uğurunda şəhid olan Vətən oğullarının xatirəsi bir dəqiqəlik sükutla yad olunub. Sonra filialın direktoru Faiq Abdullayev iştirakçılara icbari tibbi sığorta sistemi, icbari tibbi sığorta haqları, Xidmətlər Zərfi ilə təminat verilən tibbi xidmətlər, TƏBİB-in tabeliyindəki dövlət tibb müəssisələri haqqında ətraflı məlumat verib. Habelə, vətəndaşlara dövlət tibb müəssisələrində və Agentliyin müqavilə bağladığı özəl tibb müəssisələrində icbari tibbi sığortadan istifadə qaydaları izah olunub.

Sonra iştirakçıları maraqlandıran suallar cavablandırılıb.

Sonda mövzu ilə bağlı videoçarx nümayiş etdirilib.

AZƏRTAC