44 günlük Vətən müharibəsində hərbçilərimizlə yanaşı, tibb işçiləri də əsl qəhrəmanlıq və öz peşələrinə sədaqət nümayiş etdirdilər. Həkimlərimiz cəbhədə cəsarət, misilsiz dəyanət və humanizm nümunələri yaratdılar. Onlardan biri də Balakən Rayon Mərkəzi Xəstəxanasının həkim-cərrahı Vəlixan Nəsiboğludur.

Aztibb.az Balakən Rayon Mərkəzi Xəstəxanasına istinadla bildirir ki, Vəlixan Nəsiboğlu 1960-cı ilin iyulun 16-da Gürcüstan Respublikasının Telavi rayonunun Qaracalar kəndində anadan olub. Orta təhsilini Gürcüstanda alıb. 1982-cil ildə Rusiya Federasiyasında Çeçenistanın paytaxtı Qroznı şəhərində feldşer ixtisası üzrə tibbi texnikumu bitirib.

O, 1985-1991-ci illərdə Həştərxan Dövlət Tibb Akademiyasının Müalicə işi fakültəsində təhsil alıb. 1991-1992-ci illərdə isə Moskva ikinci tibb institutunun bazası olan-Kaluba Təcili Tibbi yardım xəstəxanasının cərrahiyyə şöbəsində kliniki internaturanı bitirib.

1992-ci ildən Balakən Rayon Mərkəzi Xəstəxanasında ümumi-cərrah kimi işləyir. 1994-cü ildən 1997-ci ilin dekabrına qədər Murovdağ bölgəsində Azərbaycan Milli Ordusunda hərbi cərrah və Səhra Hospitalının rəisi vəzifəsində işləyib.

Vəlixan Nəsiboğlu Rusiyada və Ukraynada təkmilləşmə kurslarında təhsil alıb. Azərbaycanın erməni işğalçılarına qarşı apardığı 2-ci Qarabağ müharibəsində həkim-cərrah kimi könüllü olaraq əsgər və zabitlərimizə xidmət göstərib.

O, qəhrəman həkim kimi, ön xətdə vuruşan yaralıların bölgədən çıxarılmasına kömək edib, əsgərlərimizə ilkin tibbi yardım göstərib.

Müəllif: Səadət Məmmədova