Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyi Naxçıvan Muxtar Respublikasında yerləşən və agentlik tərəfindən sanatoriya-kurort yollayışı verilən müalicə mərkəzlərinə mediatur təşkil edib.

Nazirlikdən veilən məlumata görə, media nümayəndələri “Duzdağ” Fizioterapiya Mərkəzi, “Darıdağ” Arsenli Su Müalicəxanası və Naxçıvan Diaqnostika-Müalicə Mərkəzində şəhid ailələri üzvləri, müharibə ilə əlaqədar əlilliyi olan şəxslər və digər imtiyazlı kateqoriyadan olan şəxslərə göstərilən xidmətlərlə əyani tanış olublar.

Qeyd edək ki, mərkəzlərə bronxial astma, əsəb, qaraciyər və öd yolları, revmatoloji və s. xəstəlikləri olan vətəndaşlar qəbul edilir və onlar səmərəli fizioterapevtik müalicə prosedurlarından keçirlər. Həmin prosedurlar nəticəsində xəstələrdə pozitiv dəyişikliklər müşahidə edilir.

Agentlik tərəfindən postmüharibə dövründə 7 minədək imtiyazlı şəxs sanatoriya-kurort və müalicə mərkəzlərinə yollayışla təmin edilib. Yollayışla təmin edilənlərdən 308 nəfər imtiyazlı şəxs Naxçıvanda yerləşən sanatoriya-kurort mərkəzlərinə göndərilib.

Müəllif: Zamiq İbrahimov