44 günlük Vətən müharibəsində hərbiçilərimizlə yanaşı, tibb işçiləri də əsl qəhrəmanlıq və öz peşələrinə sədaqət nümayiş etdirdilər. Müharibənin başlandığı gündən sonuna qədər döyüş bölgəsindən çəkilməyən həkimlərimiz həm ön, həm də arxa cəbhədə cəsarət, misilsiz dəyanət və humanizim nümunələri yaratdılar.

 

Yüzlərlə yaralı əsgərimizi həyata qaytaran həkimlər sırasında Quba Rayon Mərkəzi Xəstəxanasının direktoru Əliyar Sərvərov da xidmət göstərən Təbiblərimizdəndir.

 

O, TƏBİB rəhbərliyinin göstərişi ilə 28 sentyabr 2020-ci ildə Gəncə və Tovuz rayonlarına, müharibənin ilk həftələrindən isə Bərdə hospitalına ezam olunub. Müharibə bitənə kimi yaralı əsgərlərimizə tibbi xidmət göstərib, yaralıların döyüş bölgələrindən təxliyələrində yaxından iştirak edib.

 

Qeyd edək ki, Əliyar Sərvərov I Qarabağ müharibəsi iştirakçısıdır. 1996-cı ildə ordu sıralarına çağırılmış, ön cəbhədə Tibb məntəqə həkimi, Tibb məntəqə müdiri, tibb xidmətinin rəisi vəzifələrində çalışıb. 2012 ci ildə isə ordu sıralarından mayor rütbəsində təxris olub.

 

Müəllif: Zamiq İbrahimov