2020-ci ilin 27 sentyabrında başlanan və 44 gün davam edən Vətən müharibəsi şanlı Qələbə ilə bitdi. Vətən müharibəsində digər hərbi qulluqçularla yanaşı, tibb işçiləri də misilsiz qəhrəmanlıq və şücaət göstərdilər.

Balakən Rayon Mərkəzi Xəstəxanasının həkim-cərrahı İbrahim İskəndərov Vətən müharibəsinin ağxalatlı qəhrəmanlarından biridir. O, 1971-ci il yanvarın 20-də Balakən rayonunda anadan olub. Ali təhsilini 1991-1997-ci illərdə Azərbaycan Tibb Universitetində alıb.

1998-ci ildə Azərbaycan ordu sıralarında xidmətə başlayıb və bu dövrdə mayor rütbəsinə qədər yüksəlib. Xidməti dövründə qüsursuz xidmətə görə və Vətənə xidmətə görə Azərbaycan Respublikası Prezidenti cənab İlham Əliyev tərəfindən təltif olunub. 2019-cu ildən ordudan tərxis olunub.

İbrahim İskəndərov Vətən müharibəsi dövründə 27 sentyabr tarixindən dekabrın 30-a qədər ordu sıralarında hərbi-həkim kimi fəaliyyət göstərib. Azərbaycan Ordusunun Tərtər və Ağdərənin azadlığı uğrunda aparılan döyüş əməliyyatlarında böyük şücaət göstərərək, yaralı hərbçilərə tibbi yardım edib, xeyli sayda əsgər və zabitimizin həyatını xilas edib. O, ağır, çətin şəraitdə öz həyatını risk altına ataraq yaralılara qulluq edib.

Hazırda Balakən rayon Mərkəzi Xəstəxanasında fəaliyyətini davam etdirir.