Şirvan Şəhər Mərkəzi Xəstəxanasının əməkdaşı olan Mahirə Qarayevanın övladı, Vətən müharibəsinin qəhrəman şəhidi Elnur Qalib oğlu Qarayevin doğum günü qeyd olunub.

Aztibb.az-ın məlumatına görə, Şirvan Şəhər İcra Hakimiyyətinin başçısı İlqar Abbasov, hüquq-mühafizə orqanlarının rəhbərləri, Şəhər İcra Hakimiyyəti başçısının müavinləri və məsul əməkdaşları, şəhidin ailə üzvləri və rayon ictimaiyyətinin nümayəndələri Şəhidlər Xiyabanında Elnur Qarayevin məzarını ziyarət edib, üzərinə gül-çiçək dəstələri düzüb, onun xatirəsini ehtiramla yad ediblər.

Şirvan şəhər İcra Hakimiyyətinin başçısı İlqar Abbasov tədbirdə çıxış edərək Vətən müharibəsində qazanılan şanlı Qələbənin Azərbaycan tarixində əbədi qalacağını bildirib. Qeyd edib ki, müharibənin taleyini müəyyənləşdirən Prezident, Müzəffər Ali Baş Komandan İlham Əliyev və döyüş meydanında əsl qəhrəmanlıq göstərən Azərbaycan əsgəri oldu. Azərbaycan Ordusunun əldə etdiyi tarixi Zəfər, uzun illərdən bəri düşmən tapdağı altında qalmış torpaqlarımızın işğaldan azad edilməsi Azərbaycan xalqının özünəinamını geri qaytardı, xalqın öz Liderinə etibarını daha da möhkəmləndirdi.

İlqar Abbasov ölkəmizin hər yerində olduğu kimi, Şirvanda da şəhid ailələri, Qarabağ müharibəsi əlilləri, müharibə veteranları və digər həssas əhali qrupuna aid insanların lazımi qayğı ilə əhatə olunduğunu, şəhidlərimizin xatirəsinin daim əziz tutulduğunu bildirib. İcra başçısı qəhrəman şəhidlərimizin ömür yolunun gənclərə nümunə olduğunu, gələcək nəsillərin vətənpərvərlik tərbiyəsində əhəmiyyətli rol oynayacağını vurğulayıb.

Şəhidimizin valideyni övladı ilə qürur duyduğunu bildirərək, şəhid ailələrinə göstərilən diqqət və qayğıya görə ölkə Prezidenti, Ali Baş Komandan cənab İlham Əliyevə, Birinci vitse-prezident Mehriban xanım Əliyevaya minnətdarlığını bildirib.