2020-ci ilin 27 sentyabrı xalqımızın yaddaşında böyük Qələbəyə aparan yolun başlanğıc tarixi kimi qalacaq. 44 gün davam edən savaşda iştirak edən qəhrəmanlarımızdan biri də Saatlı Rayon Mərkəzi Xəstəxanasının Ümumi şöbənin ictimaiyyətlə əlaqələr üzrə mütəxəssisi İbrahim Haqverdiyevdir.
İbrahim Səxavət oğlu Haqverdiyev 6 avqust 1994-cü ildə Saatlı rayonunda anadan olub. 2013-2017-ci illərdə Azərbaycan Respublikasının Qərbi Kaspi Universitetində "politologiya" ixtisası üzrə bakalavr təhsili alıb. 2017-2019-cu illərdə Türkiyə Cümhuriyyətinin Hacəttəpə Universitetində "dövlət idarəçiliyi" ixtisası üzrə magistratura oxuyub.
İbrahim Haqverdiyev 2019-2021-ci illərdə hərbi xidmətə olub. Vətən uğrunda gedən II Qarabağ müharibəsində iştirak edib. Müharibə zamanı göstərdiyi qəhrəmanlıq və igidlik, nümunəvi və nizam-intizamlı davranışı döyüş yoldaşları və komandanlıq tərəfindən müsbət qarşılanıb.
O, müharibə zamanı göstərdiyi şücaətlərə görə "Suqovuşanın azad olunmasına görə", "Vətən müharibəsi iştirakçısı" medalları ilə təltif olunub.