Vətən müharibəsində iştirak etmiş tibb işçilərindən biri də Saatlı Rayon Mərkəzi Xəstəxanasının Məzrəli həkim məntəqəsinin müdiri Azər Abbasovdur.
Azər Əlihüseyin oğlu Abbasov 1971-ci ildə İmişli rayon Mirili kəndində anadan olub. 1989-1995-ci illərdə Azərbaycan Dövlət Tibb Universitetində Müalicə-profilaktika fakültəsində Müalicə işi ixtisası üzrə təhsil alıb.
O, 1996-2001-ci illərdə Azərbaycan Respublikasının Silahlı Qüvvələri sıralarında tibb xidməti leytenantı, daha sonra isə baş-leytenant hərbi rütbəsi ilə xidmətdə olub. 2003-cü ildə Saatlı RMX-nın Məzrəli həkim məntəqəsinin müdiri vəzifəsində işləyib. 2004-2008-ci illərdə İmişli MKT-Araz futbol klubunun həkimi kimi fəaliyyət göstərib. 2008-2021-ci illərdə Saatlı RMX-nın Məzrəli həkim məntəqəsinin müdiri olub.
Azər Abbasov 2020-ci il sentyabrın 22-si Vətən müharibəsinə yollanıb. Hərbi hissədə xidmətdə olarkən Ağdam-Xocavənd istiqamətində gedən döyüşlərdə iştirak edib. Müharibə zamanı göstərdiyi şücaətlərə görə "Vətən müharibəsi iştirakçısı" medalı ilə təltif olunub.
Hazırda o, Saatlı Rayon Mərkəzi Xəstəxanasının Məzrəli həkim məntəqəsinin müdiri vəzifəsində çalışır.