Bu gün Mingəçevir Şəhər Mərkəzi Xəstəxanasında çalışan şəhid ailələri ilə görüş keçirilib.

Aztibb.az-ın xəbərinə görə, əvvəlcə şəhidlərin əziz xatirəsi bir dəqiqəlik sükutla yad edilib.

Xəstəxananın direktoru Əbdülqədir Sultanov Vətən müharibəsi zamanı Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə rəşadətli ordumuzun düşmən üzərində qazandığı şanlı Qələbədən, xalqımızın birliyindən, Vətən oğullarının misilsiz qəhrəmanlıqlarından söz açıb.

Direktor tarixi Qələbənin şəhidlərin qanı bahasına əldə edildiyini, dövlətimizin və xalqımızın Vətən uğrunda canlarından keçən qəhrəman oğulların xatirəsini hər zaman uca tutduğunu vurğulayıb.

Mingəçevir şəhər Səhiyyə İşçiləri Həmkarlar İttifaqı Şurasının sədri, həkim Allahverdi Alıyev və xəstəxananın baş həkimi Ülfət Qurbanov Zəfər bayramı ərəfəsində keçirilən görüşün əhəmiyyətini qeyd ediblər. Çıxış edənlər tarixə əbədi yazılan şəhidlərimizin ölkəmizdə daim hörmət və ehtiramla yad edildiyini, onların gələcək nəsillərə örnək olduğunu vurğulayaraq vətənpərvər, mərd övladlar yetişdirdiklərinə görə şəhid valideynlərinə minnətdarlıqlarını bildiriblər.