Gəncə şəhər Birləşmiş Xəstəxanasının direktor müavini, Kardioloji xəstəxananın rəhbəri Fəxrəddin Namazovun 70 yaşı tamam olub.

 

Aztibb.az-ın məlumatına görə, bu münasibətlə xəstəxanada tədbir keçirilib.

 

Yığıncaqda Gəncə Şəhər Birləşmiş Xəstəxanasının direktoru Nazim Əhmədov yubilyarın məhsuldar fəaliyyətindən, yüksək insani keyfiyyətlərindən bəhs edib. O, Fəxrəddin Namazovun ölkəmizin səhiyyə sistemi üçün hər zaman ürəkdən çalışdığını, quruculuq işlərində mühüm addımlar atdığını bildirib, yubilyara gələcək fəaliyyətində uğurlar arzulayıb.

 

Fəxrəddin Namazova 70 illik yubileyi və fəaliyyətində göstərdiyi xidmətlərə görə Gəncə şəhər Birləşmiş Xəstəxanası tərəfindən Təşəkkürnamə təqdim olunub.

 

Qeyd edək ki, Fəxrəddin Namaz oğlu Namazov 2 noyabr 1952-ci ildə Samuxda anadan olub. Ali təhsilini 1971-1977-ci illərdə Azərbaycan Tibb Universitetində alıb. Universiteti bitirdikdən sonra fəaliyyətini Bakı şəhəri Təcili Tibbi Yardım Stansiyasında (1978-1984), Ümumittifaq Kardiologiya Elmi Tədqiqat İnstitutunda (1984-1986), A. Səhhət adına şəhər xəstəxanasında (1986-1987), 2 saylı şəhər poliklinikasında (1987-1988), Tibbi Bədən dispanserində (1988), A. Səhhət adına xəstəxanada (1988-1989), Gəncə şəhər Rayonlararası Kardiologiya İnstitutunda (1989-1992) həkim kardioloq kimi davam etdirib. O, 1992-1993-cü illərdə Gəncə şəhər Səhiyyə İdarəsinin rəisi vəzifəsində çalışıb. Artıq uzun illərdir ki, Kardioloji xəstəxananın rəhbəridir. Bir sıra yerli və beynəlxalq kardioloji təlim və konqreslərdə iştirak edən Fəxrəddin Namazov Kardiologiya Cəmiyyətinin üzvüdür.