Son tədqiqatlar vərəmin yeni növ koronavirus (COVID-19) xəstəliyi ilə əlaqəsinin olduğunu göstərib. Xüsusilə gizli vərəmi olan insanlar COVID-19-a yoluxduqda ölümlə nəticələnə bilər. Hər iki xəstəlik hava-damcı vasitəsilə yoluxur və insanlar öskürəndə və ya asqıranda yayılır.

Aztibb.az medimagazin.com.tr-yə istinadla xəbər verir ki, hər il dünyada 10 milyona yaxın insan vərəm xəstəliyinə tutulur. Bu xəstəlik dünyada ölümün ilk 10 səbəbindən biri hesab olunur. Ümumdünya Səhiyyə Təşkilatının məlumatlarına görə, xəstəlik yalnız 2018-ci ildə 1,5 milyon insanın ölümünə səbəb olub.

ABŞ-ın San Dieqo Dövlət Universiteti Xalq Sağlamlığı Məktəbinin professoru, genom mütəxəssisi və vərəm tədqiqatçısı Faramarz Valafar bildirib ki, insanlar xəstələnəndə gizli vərəmlə yanaşı, həm də SARS-CoV-2 virusunu başqalarına yoluxdura bilərlər. 

F.Valafar vərəmin qarşısını almaq üçün COVID-19-lu insanlara vərəmlə yoluxmuş xəstələrə tətbiq olunan antibiotik verilməsini tövsiyə edir.

"Vərəmə inkişaf etməkdə olan və ya az inkişaf etmiş ölkələrdə daha çox rast gəlinsə də, digər ölkələr bu xəstəliyə ciddi yanaşmasa və ya onu nəzarət altına götürməsə, bu xəstəlik COVID-19 epidemiyası kimi bütün dünyada yayıla bilər", - deyə mütəxəssis qeyd edib.