21 oktyabr 2022-ci il tarixində Balakən rayon Mərkəzi Xəstəxanasında qanvermə aksiyası keçirilib.

Aztibb.az-ın məlumatına görə, aksiya talassemiyadan əziyyət çəkən xəstələrin qanla təminatına yardım məqsədi daşıyır.

Aksiya Bakı Mərkəzi Qan bankının təşkilatçılığı ilə həyata keçirilib. Ezam olunmuş xüsusi tibb briqadasının həkim-hemotoloqları tərəfindən hər bir donorun sağlamlıq vəziyyəti öncədən müəyyən olunub, hərtərəfli tibbi müayinədən sonra onlardan qan götürülüb.

Toplanan qan nümunələri laboratoriyada yoxlanıldıqdan sonra müvafiq olaraq Talassemiya, hemofiliya və digər qan xəstəliklərindən əziyyət çəkən insanların müalicəsində istifadə olunacaq.

Xəstəxana işçilərindən 72 nəfər qanvermədə iştirak edib. Donorlar bu cür aksiyaların keçirilməsini yüksək qiymətləndirib və digər şəxsləri də qanvermədə fəal iştirak etməyə səsləyiblər.

Qeyd edək ki, aksiyanın keçirilməsində Balakən rayon Mərkəzi Xəstəxanasının direktoru Dilbər Quliyeva, direktorun inzibati məsələlər üzrə müavini Təranə Rəhimova, baş həkim Əfsələddin Buğayev yaxından iştirak ediblər.