Azərbaycan Tibb Universitetinin (ATU) tələbələri türkiyəli müəllimlərin “Tibb bacısı” ixtisası üzrə onlayn dərslərinə qoşulacaq.
Türkiyənin Qazi Universiteti və ATU-nun rektorlarının iştirakı ilə vebinar keçirilib. Onlayn görüşdə iki ali məktəb arasında əməkdaşlıq, pandemiya dövründə fəaliyyətin əlaqələndirilməsi, birgə layihələrin təşkili barədə fikir mübadiləsi aparılıb.
İclasda ATU-nun rektoru, professor Gəray Gəraybəyli rəhbərlik etdiyi müəssisədə Türkiyədən 775 nəfərin təhsil aldığını bildirib: “Onlardan 754-ü tələbə, 21-i isə rezidentdir. Həmçinin universitetimizlə Türkiyənin 23 universiteti arasında anlaşma memorandumu var. Bu sazişlər çərçivəsində bir çox sahələr üzrə qarşılıqlı fəaliyyət həyata keçirilir, birgə işlər görülür”.
G.Gəraybəyli qeyd edib ki, ATU və Qazi Universiteti arasında da anlaşma memorandumu imzalanıb. Yaxın zamanlarda bu sənədin şərtlərinin yenilənməsi planlaşdırılır. Rektor əlavə edib ki, Prezident İlham Əliyevin müvafiq Sərəncamı ilə “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” qəbul edilib. Pandemiyanın yaratdığı çətinliklərə baxmayaraq, ölkədə ali təhsilin keyfiyyətinin yüksəldilməsi istiqamətində ciddi işlər görülür. ATU-nun Qazi Universiteti ilə yenidən imzalayacağı memorandum çərçivəsində görüləcək işlər bu proqramın tələblərinə uyğun olacaq.
Qazi Universitetinin rektoru, professor Musa Yıldız Azərbaycan Tibb Universiteti ilə əməkdaşlığın yüksək səviyyədə davam edəcəyinə əminliyini ifadə edib: "Bu il ATU-da ilk dəfə olaraq “Tibb bacısı” ixtisası üzrə təhsilə start verilir. Qazi Universitetində artıq neçə illərdir ki, eyni ixtisas üzrə tədris mövcuddur. Biz bu sahədə təcrübəmizi Azərbaycanla bölüşməyə hazırıq”.
Azərbaycan Respublikasının Təhsil Nazirliyinin Beynəlxalq əməkdaşlıq şöbəsinin müdiri Nicat Məmmədli ATU-da yeni açılan “Tibb bacısı” ixtisası üzrə təhsilin tədrisində Qazi Universitetinin təklif etdiyi proqramı yüksək dəyərləndirib. O, sözügedən ixtisas üzrə dərslərin həkimlər tərəfindən aparılacağını qeyd edib. N.Məmmədli yekunda iki universitet arasında ikili diplom proqramının hazırlanmasının nəzərdə tutulduğunu deyib.
Azərbaycanın Türkiyədəki Səfirliyinin təhsil müşaviri Nəcibə Nəsibova isə çıxışında iki ölkə arasında bütün sahələrdə olduğu kimi, təhsil sahəsində də ikitərəfli əlaqələrin yüksələn xəttlə davam etdiyini söyləyib. O, bu əlaqələrin gələcəkdə daha da genişlənəcəyini vurğulayıb.
Görüşdə ATU-nun beynəlxalq əlaqələr üzrə prorektoru, dosent Orxan İsayev, Tədris şöbəsinin müdiri, dosent Samir Cavadov, İKT şöbəsinin müdiri Rəmzi Əliyev, mətbuat xidmətinin rəhbəri Günel Aslanova, Qazi Universitetinin Sağlıq elmləri fakültəsinin dekanı, professor Bülent Elbasan, Tibb fakültəsinin dekanı, professor Mustafa Necmi İlhan, Diş həkimliyi fakültəsinin dekanı, professor Kahraman Güngör də iştirak ediblər.
