Layihələrin məqsədi ucqar bölgələrdə göstərilən tibbi xidmətin keyfiyyətinin artırılması və səhiyyənin əlçatanlığının təmin edilməsidir.

 

Birinci layihə çərçivəsində Qazax rayonunun Yuxarı Salahlı və Samux rayonunun Poylu kənd tibb məntəqələrinə təcili tibbi yardım üçün nəzərdə tutulan “Mitsubishi” pikap avtomobilləri veriləcək.

 

Qazax və Samux rayon mərkəzi xəstəxanalarının hər biri veriləcək təcili tibbi yardım avtomobillərini heyətlə təmin edərək sözügedən kənd tibb məntəqələrinə təhkim edəcək.

 

İkinci layihədə Ağdaş rayonunun Aşağı Nemətabad kəndində bir mərtəbəli ailə sağlamlıq mərkəzinin (148㎡) inşa edilməsi ilə Aşağı Nemətabad kəndi və ətraf 6 kəndin (Yuxarı Nemətabad, Qobuüstü, Aşağı Qobuüstü, Qəribli, Hacılar, Yenikənd) əhalisinin tibbi xidmətdən faydalanması üçün əlçatan edəcək. Layihə icra olunduqdan sonra Ağdaş Rayon Mərkəzi Xəstəxanası sözügedən Ailə Sağlamlıq Mərkəzini tələbə uyğun işçi heyəti və ləvazimatla təmin edəcək.

 

Üçüncü imzalanan layihə çərçivəsində isə Lerik rayonunun Soru kəndində inşa ediləcək tibb məntəqəsi (117㎡) Soru kəndi və ətraf iki kəndin (Ərdəbilə və Camaşəir) sakinləri üçün tibbi xidmət göstərə biləcək. Yeni tikiləcək tibb məntəqəsində müayinə, vaksinasiya, ginekoloji və pediatriya otaqlarının olması nəzərdə tutulur və Lerik Rayon Mərkəzi Xəstəxanası bu məntəqəni də tələbə uyğun işçi heyəti və ləvazimatla təmin edəcək.

 

Qeyd edək ki, “Ot kökləri və İnsan Təhlükəsizliyi Qrant yardımı” proqramı əhalinin sosial rifahının yaxşılaşdırılması məqsədiilə təhsil, səhiyyə, ictimai sağlamlıq, kənd təsərrüfatı və s. kimi sahələrdə bilavasitə yerli əhalinin bəhrələnəcəyi nisbətən kiçik miqyaslı layihələrin həyata keçirilməsi üçün nəzərdə tutulan iqtisadi yardım proqramıdır.