Biləsuvar Ailə Saglamlıq Mərkəzində “Pediatrik Kardiologiya və Revmatologiya" İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Ürəkləri qoruyaq” – Regionlarda ürək-damar xəstəlikləri və onların profilaktikası" mövzusunda maarifləndirmə adlı layihənin ilk tədbiri keçirilib.

Biləsuvar sakinlərinin, ürək qüsurlu vətəndaşların və uşaqların valideynlərinin iştirak etdiyi tədbirdə çıxış edən Biləsuvar İlkin Səhiyyə Xidmətinin (Ailə Saglamlıq Mərkəzinin) şöbə müdiri Yusif Mürsəlov layihənin mövzusunun aktual olduğunu qeyd edib.

Daha sonra layihənin rəhbəri, "Pediatrik Kardiologiya və Revmatologiya" İctimai Birliyinin sədri Sveta Rəfiyeva layihə və mövzu barədə çıxış edib, tədbir iştirakçılarının suallarını cavablandırıb.

Bildirilib ki, layihənin məqsədi ürək-damar sistemi xəstəlikləri riski olan əhali qrupunu və ürək qüsuru olan uşaqların valideynlərino bu xəstəliklər, onların profilaktikası barədə məlumatlandırmaqla, yerlərdə əhalinin sağlamlığının yaxşılaşmasına qismən də olsa nail olmaq, xəstəliklərin qarşısını almaq və xəstəliklərə nəzarət etməklə insan potensialının inkişafına sosial-iqtisadi baxımdan yardımçı olmaqdır.

Layihə 9 rayonu - Şamaxı, Agdaş, Biləsuvar, Şirvan, Astara, Lənkəran, Gədəbəy, Şəmkir, Kürdəmir rayonlarını əhatə etməklə 3 ay müddətində (1 sentyabr-1 dekabr 2022-ci il) icra ediləcək.