Qusar Rayon Polis Şöbəsinin (RPŞ) təşkilatçılığı ilə rayonun 1 nömrəli tam orta məktəbinin şagirdləri “Narkomaniyaya yox deyək!” və "Erkən nikahın fəsadları" mövzularında maarifləndiriliblər.
Daxili İşlər Nazirliyinin mətbuat xidmətinin Quba regional qrupundan verilən məlumata görə, tədbirdə çıxış edən RPŞ-nin rəisi, polis polkovniki Eldar İlyasov dövrümüzün bəlası olan narkomaniyanın insanlara vurduğu mənəvi və maddi zərərlərdən danışıb. Bu bəlaya düçar olmuş şəxslərin sağlam həyata qayıtmasının çox çətin olduğunu qeyd edən E.İlyasov şagirdlərə diqqətli olmağı, narkotik aludəçisinə çevrilmiş şəxslərdən uzaq durmağı tövsiyə edib.
Eldar İlyasov narkomaniyanın tək ölkəmiz üçün deyil, bütün dünya üçün təhlükə mənbəyi olduğunu qeyd edərək, narkomaniyaya qarşı aparılan mübarizədən, qəbul olunan dövlət proqramından danışıb.
Daha sonra RPŞ-nin azyaşlılar üzrə baş inspektoru Səlahəddin Əmrullayev erkən nikahın fəsadlarından bəhs edib.
RPŞ-nin əməkdaşı, polis mayoru Əmin İsmayılov Daxili İşlər Nazirliyinin Polis Akademiyası barədə şagirdlərə ətraflı məlumat verərək, təhsil müəssisəsinin yaranma tarixi, inkişafı, ölkəmizdə hüquq elminin inkişafına verdiyi töhfələr, daxili işlər orqanlarının ali təhsilli hüquqşünaslarla təmin olunmasındakı fəaliyyətindən söz açıb.
