Mingəçevir Şəhər Mərkəzi Xəstəxanasının həkim-endokrinoloqu Ellada Hüseynova yod çatışmazlığının insan orqanizminə fəsadlarından bəhs edib.

Həkim bildirib ki, yod insan orqanizminin normal fəaliyyəti üçün vacib olan elementlərdən biridir. Yod bir sıra qidalarda təbii olaraq tapılan və orqanizmdə uzun müddət depolana bilməyən bir elementdir. Yod trioid hormonlarının (T4,T3) ayrılmaz hissəsidir. Yod qəbulu çox az olarsa hipotireoz, kretinizm inkişaf edə bilər.

Onun sözlərinə görə, dünyanın bəzi yerlərində torpaqlar yod baxımından kasad olduğundan bu bölgələrdə yaşayan insanların qida ilə kifayət qədər yod almaması ilə əlaqədar yod çatışmamazlığı meydana gəlir.

Orqanizmin tələb etdiyi gündəlik yod ehtiyacı insan yaşlandıqca dəyışir:
- körpələr (0-5 yaş) - gündə 90 mkq
- uşaqlarda (6-12 yaş) - gündə 120 mkq
- Yeniyetmələr və böyüklər - gündə 150 mkq
- hamiləlik və laktasiya dövründə - gündə 200-300 mkq

Endokrinoloq orqanizmdə yod çatmazlığına işarə edən əlamətləri də sadalayıb:
1. Çəkinin sürətlə artması
2. Zəiflik və yorğunluq
3. Saçların tökülməsi, dırnaqlarda qırılma
4. Dəri quruluğu
5. Daimə üşümə
6. Yaddaşın zəifləməsi
7. Qadınlarda qeyri-düzgün menstruasiya

Ellada Hüseynzadə orqanizmin yod ehtiyacını ödəmək üçün mütəmadi olaraq yodla zəngin qida məhsullarını (məsələn, dəniz məhsulları, süd və digər ağartı məhsulları, yumurta, yodlaşdırılmış duz, qara gavalı və s.) qəbul etməyin vacibliyi vurğulayıb.

"Diqqətdə saxlamaq lazımdır ki, güclü və xroniki yod çatışmazlığı qalxanabənzər vəzinin ölçülərinin böyüməsinə səbəb olur," - deyə həkim bildirib.