Mingəçevir Şəhər Mərkəzi Xəstəxanasının Maliyyə şöbəsinin Hesabatlar bölməsinin müdiri  Aqşin İsmayılov Vətən müharibəsi başlanan gündən icra etdiyi vəzifəsini təhvil verib ön cəbhəyə yollanıb. İlk olaraq, Goranboy rayonunun Tap Qaraqoyunlu kəndi, İnci çay ətrafında hərbi yürüşlərə başlayıb, düşmənlə üz-üzə mübarizəyə qatılıb.

82 mm-lik minaatan batareyada tağım komandiri olan leytenant Aqşin İsmayılov qələbə əzmi ilə Talış kəndi ətrafındakı yüksəkliklərdə, Suqovuşan istiqamətində, Füzuli rayonunda gedən döyüşlərdə qəhrəmancasına şücayət göstərib.

Azərbaycan Milli Ordusunun düşmən üzərinə yeritdiyi hər hücümdan qələbə qazanan qəhrəmanımız qələbəni mədəniyyət mərkəzi Şuşada qarşılayıb. Bütün çətinliklərə baxmayaraq üzərinə düşən bütün tapşırıqların öhdəsindən layiqincə gələn Aqşin İsmayılova Vətən müharibəsi bitdikdən sonra baş leytenant rütbəsi verilib.

Mingəçevir ŞMX-nın fəxri Aqşin İsmayılov “Suqovuşanın azad olunmasına görə”, “Füzulinin azad olunmasına görə”, “Şuşanın azad olunmasına görə”, "Vətən müharibəsi iştirakçısı" medalları ilə təltif olunub.