Vətən müharibəsi dövründə yaralı hərbçilərə yardım edən Elşad Roman oğlu Əsgərov 24 aprel 1986-cı ildə Gəncə şəhərində anadan olub. Orta məktəbi Gəncə şəhər M.Mehdizadə adına 4 saylı tam orta məktəbdə oxuyub. Ali təhsilini Odlar Yurdu Universitetində alan Elşad həkim internaturanı paytaxt Bakıda özəl xəstəxanaların birində keçib.
Daha sonra o, Rusiya Federasiyasının Sankt-Peterburq şəhərində yerləşən Meçnikov adına Şimal Qərb Universitetində ordinaturaya daxil olub. Oranı bitirdikdən sonra Səhiyyə Nazirliyinin nəzdində olan Məhkəmə Tibbi Ekspertiza və Patoloji Anatomiya birliyində (MTE PA) fəaliyyətə başlayıb.
Elşad Əsgərov Tovuz və Göygöldə MTE və PA birliyinin rəisi vəzifəsində çalışıb. Gəncə şəhər Akademik Z.Məmmədov adına TTYX-də baş həkimin müavini vəzifəsini icra edib. O, hazırda həmin tibb müəssisəsinin Arxiv şöbəsinin müdiri vəzifəsində çalışır.