Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının şöbə müdiri, tibb elmləri doktoru Nuran Abdullayev  beynəlxalq elmi arenada bir ilkə imza atıb.

Aztibb.az xəbər verir ki, bu barədə N.Abdullayev “Facebok” sosial şəbəkəsində məlumat paylaşıb:

“Böyük qürur hissi ilə nəzərinizə çatdırmaq istəyirəm ki, müəllifi və ideya sahibi olduğum iki yeni elmi tədqiqat işi Almaniyanın Kassel şəhərində keçiriləcək Almaniya Neyroradioloji Cəmiyyətinin 57-ci Konqresində təqdim olunacaq. Tədqiqatlardan biri beyin insultları zamanı icra etdiyimiz əməliyyatların nəticəsinin optimallaşdırılması istiqamətində aparılıb. Belə ki, əməliyyatı icra edən cərrahın əməliyyatın fərqli saatlarındakı xüsusi psixoloji vəziyyətinin əməliyyatın nəticəsinə birbaşa əlaqəsi sübut edilmişdir. Digər tədqiqat isə beyin damarlarının anevrizmasının partlaması ilə əlaqədardır".

Həkim təklif etdiyi hipotezin tədqiqat nəticəsində öz sübutunu tapdığını nəzərə çatdırıb:

"Belə ki, sümük sıxlığının beyin anevrizmalarının partlamasındakı xüsusi rolu sübut edilir. Hər iki elmi tədqiqat beynəlxalq elmi arenada neyroradiologiya sahəsində iki fərqli istiqamət və yeni elmi araşdırma yolu açır ki, bu da elmə dəyər verən cəmiyyətlərdə misilsiz uğurlardan hesab edilir".

N.Abdullayev bu uğurun təkcə Azərbaycan tibb tarixində deyil, eləcə də beynəlxalq elmi arenada bir ilk olduğunu vurğulayıb.