Mingəçevir Şəhər Mərkəzi Xəstəxanasında tibb bacılarının vəzifələrini daha dolğun icra etmələri məqsədilə təlimlər keçirilir.

Xəstəxananın baş tibb bacısı Humay Sadıqova təlim iştirakçılarına tibbi prosedurların yerinə yetirilməsi, xəstələrə hər cür psixoloji yardımın göstərilməsi, tibbi sənədlərin qeydi, xəstələrin vəziyyətinin monitorinqi, xəstələrə dəstək, xəstələrin qeydiyyatı, dərman vasitələrinə nəzarət uçotu funksiyalarının icra edilmə üsulları barədə məlumat verib.

Xüsusilə müasir dövrdə tibb bacısının peşəsinin daha önəmli və məsuliyyətli peşələrdən biri olduğunu diqqətə çatdıran baş tibb bacısı bu peşədə çalışan işçilərə qoyulan tələblər həkimlərdən heç də az olmadığını qeyd edib: "Tibb bacılarının peşəkar fəaliyyətinə bilik və bacarıqla yanaşı, şəxsi keyfiyyətlər də daxildir. Ona görə də həssas, nəzakətli, ünsiyyətcil, məsuliyyətli və fədakarlıq nümayiş etdirən tibb bacıları pasiyentlərin müalicəsində daha müsbət nəticələr əldə edə bilirlər".