Müharibənin ilk günlərindən cəbhə bölgəsinə yollanan, peşə borcunu qürurla yerinə yetirən qəhrəman həkim - Mingəçevir Şəhər Mərkəzi Xəstəxanasının Anesteziologiya və Reanimasiya şöbəsinin həkim-reanimatoloqu Polad Qasımovdan danışacağıq.

 

Polad Mirzə oğlu Qasımov 28 sentyabr 1973-cü ildə Tərtər rayonunda anadan olub. 1989-1995-ci illərdə Azərbaycan Tibb Universitetinin Pediatriya fakültəsində təhsil alıb. 1995-1996-cı illərdə Sumqayıt şəhər TTTYS-nın Reanimasiya şöbəsində internatura keçib. 1996-cı ildən Mingəçevir ŞMX-nın Anesteziologiya və Reanimasiya şöbəsində reanimatoloq vəzifəsində çalışır.

 

Polad həkim 44 günlük Vətən müharibəsinin fəal iştirakçılarındandır. O, Tərtər, Ağdərə, Suqovuşan uğrundə gedən döyüşlərdə tabor həkimi olaraq xidmət göstərib. İgid əsgərlərimizlə bərabər düşmənlə mübarizə aparan Polad Qasımov Suqovuşan istiqamətində gedən döyüşlərdə yaralansa da 07 oktyabr 2020-ci ildə müalicə olunduqdan sonra yenidən döyüş mövqeyinə qayıdıb, Vətən borcunu yerinə yetirməyə davam edib və Qələbə əldə edənədək döyüşüb. Milli Ordunun qəhrəman oğulları ilə birgə düşmənə zərbələr endirən Polad həkim, eyni zamanda peşəsinə sadiq qalaraq yüzlərlə əsgərimizin yarasına məlhəm olub, həyatda qalması üçün əlindən gələni əsirgəməyib.

 

Polad Qasımov Vətən müharibəsində göstərdiyi şücaətə görə Ali Baş Komandan tərəfindən “Vətən müharibəsi iştirakçısı”, “Cəsur döyüşçü” və "Suqovuşanın azad olunmasına görə" medalları ilə təltif olunub.