Birinci və İkinci Qarabağ müharibəsində arxa cəbhədə mübarizə aparan həkimlərdən biri də Mingəçevir Şəhər Mərkəzi Xəstəxanasının Poliklinika şöbəsinin müdiri, ümumi cərrah Laçın Kərimovdur.

Laçın Kərimov 07 yanvar 1971-ci ildə Mingəçevir şəhərində anadan olub. 1991-1997-ci illərdə Azərbaycan Dövlət Tibb Universitetinin Pediatriya fakültəsində təhsil alıb, ümumi uşaq cərrahi ixtisasına yiyələnib. 1997-1998-ci illərdə Mingəçevir ŞMX-da internatura keçib. 1998-2001-ci illərdə Azərbaycan Ordusunda, düşmənlə üz-üzə, ön cəbhədə tibb xidməti rəisi olaraq həqiqi hərbi xidmət keçib.

 

O, 2001-2019-cu illərdə Mingəçevir şəhər 2 saylı Poliklinikasında və Uşaq cərrahiyyə şöbəsində işləyib. 2019-cu ildən etibarən Mingəçevir ŞMX-nın Poliklinika şöbəsinin müdiri vəzifəsində çalışır.

 

Qəbuluna gələn pasiyentlər arasında müharibə iştirakçıları, qazilər olarsa onlara qarşı xüsusi diqqət göstərən Kərim Kərimov özünün də Vətənin müdafiəsi uğrunda gedən döyüşlərdə iştirak etməsindən qürur duyduğunu deyir, yardım edə bildiklərindən fəxlə danışır, köməklik göstərə bilmədiyi şəhid qardaşlarını isə kədərlə xatırlayır: - “Düz iki dəfə keçmişəm Qarabağın qanlı yollarından. İndi oturub şəhid yoldaşlarımı fikirləşəndə deyirəm ki, kaş onlar da əlsiz-ayaqsız olaydılar, amma qayıdaydılar, görəydilər yurdlarındakı bu qələbə büsatını, Müzəffər Ordunun dik duruşunu”.

 

Peşəkar cərrah Kərim Kərimov Azərbaycan Respublikasının müdafiəsi uğrunda gedən döyüşlərdə 2 dəfə iştirak edib. 1992-ci ildə I Qarabağ müharibəsi dövründə 6 ay könüllü olaraq ön cəbhədə - Ağdam rayonu Novruzlu kəndi ətrafında gedən döyüşlərdə qəhrəmancasına xidmət göstərib. 2020-ci ildə II Vətən müharibəsi başlayan kimi də vəzifəsinə sadiq qalaraq ön cəbhəyə yollanan Kərim həkim 4 ay sonra ailəsinə və işinə geri dönüb. Mingəçevir şəhər Mərkəzi Xəstəxanasından könüllü cəbhəyə üz tutan, Füzuli ətrafında gedən döyüşlərdə taborların birində tibb xidmətinə rəhbərlik edən, həm döyüşən, həm yaralı yoldaşlarına yardım edən, yaralansa belə, bütün çətinliklərə baxmayaraq ordu ilə birgə irəliləyən və qələbəni Şuşa şəhərində qarşılayan Kərim Kərimova hamı indi qəhrəman kimi baxır.

 

Qazi həkim Kərim Kərimov o günləri xatırladıqca yenə də gözləri dolur, özünü saxlaya bilmir: - “Minamyot qəlpəsindən ağır yaralansam da tez zamanda yaralarımı sarıdıb döyüş yolladaşlarımın yanına qayıtdım. Belə bir zamanda geridə qalmaq olmazdı. Hamıda elə bir əhval-ruhiyyə vardı ki, canavar kimi vuruşurdular. Bəli, onların hamısı qəhrəman idi. 25-30 il boğazımızda düyünlənmiş qəhərimiz vardı, bunun çarəsi ancaq Qələbə idi. Böyük çətinliklə Şuşaya doğru irəlilədik. Düşmən Xankəndi tərəfdən Şuşanı intensiv atəşə tuturdu deyə tapşırığa əsasən şəhər ətrafındakı ərazilərə çəkilib şəhəri ətrafdan qorumağa başladıq. İnanın qələbə əzmi döyüşçülərdə elə yüksək idi ki, əlimizdə silah, çiyinlərimizdə isə yaralı və şəhid döyüşçülər zirvəyə doğru döyüşə-döyüşə 300 spartalı kimi qalxırdıq. Elə həmin vaxt qələbə xəbəri gəldi. O mənzərəni xatırlayanda indi də məni qəhər boğur. Cəmi bir neçə saat, hətta 5-10 dəqiqə əvvəl şəhid olan döyüş yoldaşlarımızın cəsədi önündə diz çöküb səcdə qılırdıq.”

 

“Mən qələbəni Şuşada qarşıladığım üçün özümü qəhrəman əsgər hesab edirəm.” – deyən qəhrəman həkim Kərim Kərimov “Şuşanın azadığına görə” medalı ilə təltif olunub.