Akademik Zərifə Əliyeva adına Milli Oftalmologiya Mərkəzinin Avtomobil Səyyar klinikası K.Fərəcova adına Elmi-Tədqiqat Pediatriya İnstitutunda tibbi aksiya keçirib.
Aztibb.az xəbər verir ki, Mərkəzin Elmi-məlumat, tədris və təşkilati-metodik bölməsindən verilən məlumata görə, aksiya çərçivəsində institutun 59 əməkdaşı müayinə olunub.
Aksiya xüsusi karantin rejiminə əməl olunmaqla həyata keçirilib. Əsas məqsəd vaxt itirmədən, yerindəcə operativ şəkildə pasiyentləri müayinə-müalicə etmək, göz xəstəlikləri ilə bağlı monitorinqlər aparmaq, əldə edilən nəticələri müzakirə etmək, aşkarlanan problemlərin həllinə nail olmaqdır.
Qeyd edək ki, akademik Zərifə Əliyeva adına Milli Oftalmologiya Mərkəzinin avtomobil və dəmiryolu səyyar klinikası mütəmadi olaraq paytaxtda və respublikanın bir çox regionlarında aksiyalar keçirir.