TƏBİB-in Tibbi fəaliyyətin təşkili departamentinin əməkdaşları tibbi xidmətin və sənədləşmənin icrasına nəzarət, tibbi xidmətin təşkilinin tənzimlənməsi məqsədi ilə Gəncə Şəhər Birləşmiş Xəstəxanasında (ŞBX) olub.
Gəncə ŞBX-nin tabeli stasionar tibb müəssisələri və onların nəzdində olan müvafiq ambulator struktur bölmələrə baxış keçirilib, tibbi xidmətin qurulması və keyfiyyətinin yaxşılaşdırılması istiqamətində struktur bölmə rəhbərlərinə tövsiyə və tapşırıqlar verilib. Müəssisələrdə tibbi qeydiyyat sənədlərinin tərtibatı, tətbiqi, onların istifadəsinə nəzarətlə bağlı müvafiq mövcud təlimatlar haqqında məlumat verilib.
Eyni zamanda, tibb müəssisələrində adekvat tibbi xidmətin göstərilməsi üçün zəruri təchizat ehtiyacları müəyyənləşdirilib. Mövcud kadr potensialının dəyərləndirilməsi, kadr çatışmazlığı səbəblərinin və kadr ehtiyacının müəyyənləşdirilməsi, müəssisələrdə çalışan tibbi personalın səmərəli fəaliyyətinin təmin edilməsi üzrə fikir mübadiləsi aparılıb.
Tibb müəssisələrində xidmətin təşkilində çatışmazlıqlar, vətəndaşların tibbi xidmətə əlçatanlığının təmin edilməsi, xəstələrin təxliyyəsinin tənzimlənməsi, tibbi sənədləşmənin düzgün icrası, tibb personalının vəzifə təlimatlarının qaydalara uyğun yerinə yetirilməsi, yerlərdə nəzarət mexanizmlərinin gücləndirilməsi kimi məsələlər də müzakirə olunub.
