Şəmkir Rayon Mərkəzi Xəstəxanasında şəhid ailələri, qazilər və müharibə iştirakçıları ilə görüş keçirilib. Görüşə xəstəxananın Qazilərlə iş şöbəsinin əməkdaşları, xəstəxanada yeni işə götürülmüş müharibə iştirakçıları və şəhid ailə üzvləri də qatılıblar.

Əvvəlcə Vətən müharibəsi şəhidlərinin əziz xatirəsi bir dəqiqəlik sükutla yad edilib.

Tədbirdə "Şəmkir Rayon Mərkəzi Xəstəxanası" Publik Hüquqi Şəxsin direktoru Emin İsmayılov xəstəxanada qazilərlə işin aparılması üçün yeni yaradılmış Qazilərlə iş şöbəsinin fəaliyyətindən danışıb. Bildirib ki, son bir il ərzində xəstəxanaya ümumilikdə 25 nəfər müharibə iştirakçısı və şəhid ailəsi üzvündən olan işçi götürülüb.

Daha sonra Şəmkir rayon İcra Hakimiyyətinin əməkdaşı və xəstəxananın Dializ şöbəsinin müdiri çıxış ediblər. Qeyd olunub ki, 44 günlük  Vətən müharibəsi qəhrəman şəhid və qazilərimiz sayəsində bütün dünyaya haqq uğrunda mübarizədə qələbənin necə qazanılmasını göstərdi. Şəhidlərimiz bütöv Azərbaycanı gələcək nəslə əmanət qoyub getdilər. Onlar qanları və canları bahasına bu torpaqları düşməndən azad etdilər. “Dəmir yumruq” düşmənin başını əzdi, onlara Azərbaycan xalqının nəyə qadir olduğunu sübut etdi. Allah bütün şəhidlərimizə rəhmət eləsin, qazilərimizə cansağlığı versin.

Sonda şəhid anaları Hekayət xanım və Xanımzər xanım çıxış edərək qəhrəman övladları ilə fəxr etdiklərini bildirib, onlara göstərilən qayğıdan danışııblar. Şəhid anaları tədbirin təşkilatçılarına təşəkkürlərini bildiriblər.