Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin sədri Vüqar Behbudov Bərdədə yeni fəaliyyətə başlayan sağlamlıq imkanları məhdud uşaqlar üçün sosial reabilitasiya mərkəzini ziyarət edib.

Agentliyin ictimaiyyətlə əlaqələr və kommunikasiya şöbəsindən verilən xəbərə görə, Sosial Xidmətlər Agentliyinin sosial sifarişi ilə “Sağlamlıq imkanları məhdud uşaqlar üçün sosial reabilitasiya mərkəzlərinin fəaliyyətinin təşkili” layihəsi çərçivəsində yaradılan mərkəzdə həmin rayondan olan sağlamlıq imkanları məhdud 100 uşaq sosial xidmətlərə cəlb olunacaq.

Sədr bildirib ki, Prezident İlham Əliyevin tapşırığı ilə həssas əhali qruplarından olan şəxslərin sosial müdafiəsi, reabilitasiyası və digər sosial xidmətlərlə təmin edilməsi tədbirləri davamlı xarakter daşıyır.

Əmək və Əhalinin Sosial Müdafiəsi Nazirliyi tərəfindən xüsusi qayğıya ehtiyacı olan şəxslərin sosial reabilitasiyası, sağlamlıq imkanları məhdud uşaqların cəmiyyətə inteqrasiyası məqsədilə mütəmadi olaraq sosial proqramlar icra olunur.

V.Behbudov qeyd edib ki, sağlamlıq imkanları məhdud uşaqların zəruri sosial xidmətlərlə əhatə olunması məqsədi daşıyan sosial reabilitasiya mərkəzlərində onlara sosial-psixoloji, sosial-pedaqoji, abilitasiya, ailəyə dəstək və ailənin maarifləndirilməsi xidmətləri göstəriləcək. Bununla da reabilitasiyaya cəlb olunan uşaqların psixo-sosial vəziyyətlərində müsbət dəyişikliklərin olunması hədəflənir.

Layihə çərçivəsində 25 rayonda (Ağdam, Ağstafa, Astara, Balakən, Bərdə, Biləsuvar, Cəlilabad, Gəncə, Göyçay və s.) yaradılacaq sosial reabilitasiya mərkəzlərinin hər birində 100 nəfər sağlamlıq imkanları məhdud uşaq müvafiq xidmətlərə cəlb olunacaq.