Alimlər itburnu bitkisinin revmatoid artrit ilə əlaqəli ağrıları minimuma endirməyə kömək edən səmərəli vasitə olduğunu aşkar ediblər. 

Adətən bu vəziyyəti müalicə etmək üçün qeyri-steroid antiinflamatuar dərmanlar (QAİD) istifadə olunur. Bundan əlavə, xəstəliyi dəyişdirən dərmanlar və kortikosteroidlər təyin edilə bilər. Lakin bu müalicələrin çoxu qan təzyiqi, mədə xorası və qanaxma da daxil olmaqla xoşagəlməz təsirlərlə müşayiət edilir.

Aztibb.az medikforum.ru saytına istinadla xəbər verir ki, tədqiqatın müəllifləri araşdırmada revmatoid artritdən qaynaqlanan ağrıları azaltmağa qadir olan təbii maddələrdən olan itburnu meyvələrindən  bəhs ediblər. 

Alimlər revmatoid artrit xəstəsi olan 89 xəstənin iştirakı ilə nəzarət müayinəsi aparıblar. Könüllülərə altı ay ərzində itburnu meyvələrinin cövhəri və plasebo tərkibli əlavə veriblər. Nəticələr göstərib ki, itburnu qəbul edən qrupda oynaqların ağrısının 30% azalması və aktivlik səviyyəsinin yüksəlməsi qeydə alınıb.

Bu təbii vasitənin artrit zamanı ağrının azaldılmasına təsiri Skandinaviya və Almaniyada aparılmış əlavə tədqiqatlar ilə də yoxlanılıb. Onun ekstraktı ilə hazırlanmış əlavələrin oynaqlarda ağrı, sərtlik və şişkinliyi azaltmağa kömək etdiyi də təsdiqlənib.