Rubrikada bu dəfə Mingəçevir Şəhər Mərkəzi Xəstəxanasının gənc həkimi Orxan Rzayev haqqında məlumatları təqdim edirik.

 

Orxan Dağlar oğlu Rzayev 25 aprel 1990-cı ildə Mingəçevir şəhərində anadan olub. 2008-2014-cü illərdə Azərbaycan Tibb Universitetinin Müalicə profilaktika fakültəsində təhsil alıb.

 

O, həkimlik fəlaiyyətinə 2014-cü illərdə Daşkəsən rayon N saylı Hərbi hissədə başlayıb, 2016-cı ilədək terapevt həkim kimi hərbi hissənin əməkdaşlarına xidmət göstərib.

 

Gənc həkim daim ixtisası üzrə kurslarda iştirak edərək peşəsini və təcrübəsini artırır. 2016-cı ildə Türkiyə Cümhuriyyətinin Ankara şəhər Gülhane Egitim və Araşdırma xəstəxanasında ixtisası üzrə kurs keçib. 2017-2020-ci illərdə Bakı şəhər Silahlı Qüvvələrin Baş Klinik Hospitalında həkim terapevt işləyib. 2019-cu ildə Rusiya Federasiyası Sankt-Peterburq şəhərinin Serenov adına Tibb Universitetində kurs keçib. 

 

Orxan Rzayev 20 sentyabr 2020-ci ildə könüllü olaraq Vətən müharibəsinə yollanıb, Suqovuşan və Laçın uğrunda gedən döyüşlərdə qəhrəmancasına döyüşüb. Hərbi hissədən 01 yanvar 2021-ci ildə təxris olunub.

 

Azərbaycan Silahlı Qüvvələrinin zabiti, baş leytenant Orxan Rzayev Azərbaycan Respublikası Prezidentinin Sərəncamları ilə “Vətən uğrunda” və “Laçının azad olunmasına görə” medalları ilə təltif olunub.

 

Gənc həkim 2021-ci ildən Mingəçevir Şəhər Mərkəzi Xəstəxanasında həkim-terapevt vəzifəsində çalışır.