Akademik Zülfüqar Məmmədov adına xəstəxana 1959-cu ildən fəaliyyət göstərir. Daha əvvəl tibb ocağı Kirovabad şəhər Təcili Tibbi Yardım xəstəxanası,1988-ci ildən isə Gəncə şəhər Təcili Tibbi yardım xəstəxanası adlandırılıb.

Aztibb.az-ın məlumatına görə, xəstəxana 2 korpusdan ibarətdir. Burada 1960-cı ildən Travmatologiya, Terapiya və yardımçı şöbələr, 1983-cü ildən isə Cərrahiyyə şöbəsi fəaliyyət göstərir.

Günün 24 saatı əhaliyə təcili və təxirəsalınmaz tibbi yardım göstərən xəstəxanada icbari tibbi sığortaya keçid ilə əlaqədar yeni şöbələr açılıb. Hazırda xəstəxanada Cərrahiyyə (buraya travmatoloji, otolorinqoloji və uroloji çarpayılar da daxildir) və onun bölmələri, Reanimasiya, Terapiya, Radiologiya, Fizioterapiya, Laboratoriya və onun bölmələri, Təcili yardım şöbəsi, eyni zamanda tibb müəssisəsinin nəzdində olan Poliklinika şöbəsi və onun bölmələri, həmçinin Vərəm, Endokrinoloji, Oftalmoloji, Pediatriya şöbələri fəaliyyət göstərir.

Akademik Z.Məmmədov adına xəstəxana Gəncə şəhərində fəaliyyət göstərən ən böyük xəstəxanalardan biridir. Burada uzun illər Gəncənin tanınmış həkimləri çalışıb. Bunlardan Qəzənfər Ələsgərov (baş həkim), Ənubət Nəzərli (baş həkim), Subatay Rzayev (cərrah), Balaxanım Yusibova (ginekoloq), Kamal İsmayılov (uroloq), Rauf Həsənov (uroloq), Çərgiz Novruzov (lor), Davud Həsənov (ginekoloq), Bəşir Abdullayev (terapevt), Eldar Həsənov (reanimatoloq), Cavad Əliyev (reanimatoloq), Telman Feyzullayev (travmatoloq), Kamil Həsənov (cərrah), Niyazi İbrahimov (cərrah), Könül Ələkbərov (reanimatoloq) və digərlərinin adlarının çəkmək olar.

Hazırda tibb müəssisəsində yenidənqurma işləri həyata keçirilir. Belə ki, Təcili yardım, Reanimasiya və Radiologiya şöbələri yenidən qurularaq əhalinin istifadəsinə veriləcək. Bununla yanaşı, xəstəxanada mərkəzləşmiş oksigen təminatı sistemi də qurulur.
Tibb müəssisəsinin xidmətindən nəinki Gəncə şəhəri, eləcə də ətraf rayonların əhalisi istifadə edir.

Ünvan: Fətulla Həsənov küçəsi 53
Elektron ünvan: gttyx@mail.ru
Əlaqə telefonu: (022) 256-87-55