Aztibb.az-ın "Həkimlərimizi tanıyaq!" rubrikasının növbəti buraxılışında uzman həkim, Gəncə şəhər Birləşmiş Xəstəxanasının direktor müavini, Abbas Səhhət adına xəstəxananın rəhbəri, tibb üzrə fəlsəfə doktoru İlkin İsmayılov haqqında məlumatları diqqətinizə çatdırırıq. 

İlkin İsmayılov 22 oktyabr 1985-ci ildə Bakı şəhərində anadan olub. 2003-2009-cu illərdə Azərbaycan Tibb Universitetində (Müalicə işi) təhsil alıb. Daha sonra universitetin Onkologiya kafedrasında internatura keçib.

O, 2009-cu ildə Türkiyənin Qazi Universitetinin Ümumi cərrahiyyə sahəsində təhsilini davam etdirib. Həmin universitetdə uzmanlıq elmi dərəcəsini alan İlkin İsmayılov 2016-cı ildə Gəncə Beynəlxalq Xəstəxanasında ümumi cərrah, baş həkim, daha sonra isə baş direktor vəzifəsində çalışıb.

2017-ci ildə dissertasiya işini müdafiə edərək tibb üzrə fəlsəfə doktoru elmi dərəcəsini alıb. Hazırda Tibb Universitetinin I Cərrahiyyə xəstəliklər kafedrasının doktorantıdır.

Uzman həkim bir sıra yerli və beynəlxalq konfrans və seminarlarda iştirak edib.

O, 2021-ci ildən Gəncə şəhər Birləşmiş Xəstəxanasının direktor müavini, Abbas Səhhət adına xəstəxananın rəhbəridir.