Səhiyyə Nazirliyi İctimai-Səhiyyə İslahatlar Mərkəzi (İSİM) ilə Ailə, Qadın və Uşaq Problemləri üzrə Dövlət Komitəsi mütəmadi olaraq birgə əməkdaşlıq çərçivəsində yeniyetmə və gənclərin sağlam həyat tərzi, reproduktiv sağlamlıq və ailə planlaşdırılmasına dair biliklərinin artırılması, təhlükəsiz cinsi davranış vərdişlərinin formalaşdırılması, uşaqların doğulanadək cins seçiminin qarşısının alınması məqsədilə maarifləndirmə tədbirləri həyata keçirir. Bu istiqamətdə keçirilən tədbirlərin davamı olaraq 15 aprel 2022-ci il tarixdə İsmayıllı Uşaq və Ailələrə Dəstək Mərkəzində “Selektiv abortlar və erkən nikahlar. Reproduktiv sağlamlıq və ailə planlaşdırılması” mövzusunda maarifləndirmə tədbiri təşkil olunub.

 

İSİM-in həkim-metodisti Zümrüd Kazımova mövzu üzrə təqdimatla çıxış edərək, reproduktiv sağlamlığın əsas amillərindən söz açıb. O, fərdi gigiyena qaydaları, ailə planlaşdırılması barədə tədbir iştirakçılarını məlumatlandırıb.

 

Daha sonra İSİM-in həkim-metodisti Pərvin Quliyeva hamiləliyin süni surətdə pozulmasının qadınların reproduktiv sağlamlığına, psixoloji durumuna göstərdiyi mənfi təsirindən danışıb və cinsindən asılı olmayaraq sağlam uşaqların doğulmasına diqqət yetirməyin vacibliyini vurğulayıb.

 

Yekunda iştirakçıları maraqlandıran suallar cavablandırılıb.