Mərkəzi Gömrük Hospitalının oftalmoloqu Ülfət Cəfərova "Facebook" sosial şəbəkəsində “Məktəbdən öncə göz müayinəsi niyə vacibdir?” sualını cavablandırıb.
Həkim bildirib ki, uşaqlarda rast gəlinən göz xəstəlikləri vaxtında aşkarlandıqda müalicəsi də effektiv olur. Müayinə zamanı nə uşağın, nə də valideynin bilmədiyi, xəbərdar olmadığı patologiyalar ortaya çıxa bilər. Uşaqlar arasında daha çox miopiya, hipermetropiya, astiqmatizm kimi eynək tələb edən patalogiyalara, göz tənbəlliyi, gizli çəplik, anadangəlmə patologiyalara rast gəlinir.
O, qeyd edib ki, vaxtında aşkarlanmış refraksiya dəyişiklikləri eynəklə korreksiya olunmaqla, gözləri yüksək görmə ilə təmin edir və göz tənbəlliyinin qarşısı alınmış olur. Həmçinin, uşaqlıqda aşkarlanmış bəzi çəplik növləri əməliyyatsız uğurla müalicə olunur. Bəzən yaşıdlarından dərsdə geri qalan və ya yazı xəttində səliqəsizlik, əyriliklər olan uşaqların görməsi yoxlanılmalıdır. Belə ki, miopiya adlı refraksiya dəyişikliyi əsasən məktəb illərində yaranır:
"Miopiya xəstəliyinin qarşısının vaxtının alınması üçün mütəmadi olaraq müayinə edilməsi vacibdir. Distant formatda keçirilən tədris zamanı uşaqların gözünə daha çox yük düşür. Bunun üçün dərs saatları arasında fasilələr verilməli, uşağın otağı keyfiyyətli işıqlandırılmalı, monitordan aralılıq məsafəsi qorunmalı, yüngül idman hərəkətləri öyrədilməli və göz gimnastikası izah edilməlidir. Məktəblilər dərsdən sonra yaşıllıqda gəzməli və açıq havada çox vaxt keçirməlidirlər. Qida rasionunda qırmızı və sarı çalarlı meyvə-tərəvəzlərə, balıq, süd məhsullarına üstünlük verməlidirlər".
