"Yevlax Rayon Mərkəzi Xəstəxanası” Publik Hüquqi Şəxsdə tibb bacılarının/qardaşlarının bilik və bacarığının artırılması məqsədilə təlimlər davam etdirilir.
Aztibb.az xəbər verir ki, xəstəxanada növbəti təlim baş tibb bacılarına/qardaşlarına işlərinin təkmilləşdirilməsi sahəsində görülməli olan tədbirlər barədə məlumat və tövsiyələr vermək, eləcə də onları məlumatlandırmaq məqsədilə təşkil olunub.
Təlim xəstəxananın anestezioloq-reanimatoloq həkimi Tural Rzazadə tərəfindən aparılıb. O, bu cür təlimlərin keçirilməsinin tibb işçilərinin peşəkar hazırlıq səviyyəsinin artmasında, keyfiyyətli tibbi xidmətlərin göstərilməsində əhəmiyyətli rol oynadığını bildirib.
T.Rzazadə tibb bacılarının/qardaşlarının peşəkarlığını artırmaq məqsədilə mərhələli şəkildə təlimlərin həyata keçiriləcəyini vurğulayıb.
Daha sonra Yevlax Rayon Mərkəzi Xəstəxanasının direktoru Fazil İsmayılov çıxış edərək bildirib ki, əsas məqsədimiz tibb müəssisələrində çalışan tibb işçilərinin bilik, bacarıq və vərdişlərinin təkmilləşdirilməsinə, təlim zamanı əldə etdikləri bilik və təcrübənin gələcəkdə səmərəli tətbiqinə nail olmaqdır. Nəticə etibarı ilə əhaliyə göstərilən tibbi xidmətlərin keyfiyyətinin artırılmasını, tibb müəssisələrinə müraciət edənlərin icbari tibbi sığorta sisteminə etimadını və xidmətlərdən məmnunluq səviyyəsinin yüksəldilməsini təmin etməkdir.
