Naxçıvan Diaqnostika Müalicə Mərkəzində mürəkkəb cərrahi əməliyyat aparılıb.

Naxçıvan Muxtar Respublikası Səhiyyə Nazirliyinin mətbuat xidmətindən bildirilib ki, bir neçə gün əvvəl belindən sol aşağı ətrafa yayılan şiddətli ağrı və keylik şikayətləri ilə Naxçıvan Diaqnostika Müalicə Mərkəzinə müraciət edən xəstədə L5-S1 fəqərəarası diskin yırtığı aşkar edilib. Mərkəzin həkim-neyrocərrahı Vüqar Verdiyev tərəfindən xəstəyə “L5-S1 diskektomiya, sekvestrektomiya (əsas diskdən qopub onurğa kanalına düşmüş disk parçasının çıxarılması)” diaqnozu qoyulub.

Ümumi narkoz altında əməliyyat zamanı mikroskopdan istifadə edilərək dəridə 3-4 santimetr uzunluğunda kəsik aparılıb. Fəqərəarası seqmentin minimal rezeksiyası ilə disk yırtığı xaric olunub.

Əməliyyatdan sonra xəstənin ağrısı tam keçib və ağrı səbəbindən yaranmış hərəkət çətinliyi aradan qalxıb. Xəstə 2 gün həkim nəzarətində saxlanıldıqdan sonra ağrılardan azad olmuş şəkildə yola salınıb.