Bu gün Şirvan şəhərində "MediYus" adlı klinikanın açılışı olub.

Aztibb.az xəbər verir ki, açılış mərasimində Şirvan şəhər İcra Hakimiyyəti başçısının müavini Aynur Fərzəliyeva, "Şirvan şəhər Mərkəzi Xəstəxanası" PHŞ-ın direktoru Kamil Əhmədov, Şirvan Müalicə Diaqnostika Mərkəzinin direktoru Nəsib Səhratov, tibb işçiləri və şəhər sakinləri iştirak edib.

Klinikanın həkimi Günel Sayılova bildirib ki, "MediYus" klinikasında lor, ginekoloq, uroluq, pediatr, ümumi cərrahiyyə, USM, kardioloq, fizioterapevt, endokrinoloq, nevropatoloq, qastroentreroloq, terapevt, dermokosmetoloq kimi sahələr üzrə həkimlər fəaliyyət göstərəcək. Onun sözlərinə görə, klinikada son nəsil 4D formatlı USM aparatı “Sonoscape p20”, Exo aparatı S8 ekspert, fizioterapiya BTL kombayn, laparoskopik cərrahiyyə üçün aparat, sterilizasiya üçün avtoklav, ginekoloji kolposkop aparatı, həmçinin müasir avtomatlaşdırılmış laboratoriya mövcuddur. G.Sayılova klinikaya yaxın zamanda müasir standartlara cavab verən yeni tibbi avadanlıqların gətiriləcəyini də diqqətə çatdırıb.

Daha sonra Şirvan şəhər İcra Hakimiyyəti başçısının müavini Aynur Fərzəliyeva açılış lentini kəsərək, klinikanın fəaliyyətə başlamasını Şirvan şəhəri üçün əlamətdar hadisə adlandırıb. Bildirib ki, insanların sağlamlığına cavabdeh olmaq, düzgün müalicə etmək, müasir tibbi avadanlıqlardan səmərəli istifadə etmək, səhiyyə sahəsindəki yeniliklərdən xəbərdar olmaq və bütün bunları praktikada tətbiq etmək tibb işçilərinin üzərinə böyük məsuliyyət qoyur. O, bu yolda tibb işçilərinə uğurlar arzulayıb.

Tədbirdə çıxış edən Şirvan şəhər Mərkəzi Xəstəxanasının direktoru Kamil Əhmədov və "Şirvan Müalicə Diaqnostika Mərkəzi" PHŞ-ın direktoru Nəsib Səhratov Şirvanda müasir standartlara cavab verən, ən son nəsil cihazlarla təmin olunmuş belə bir klinikanın fəaliyyətə başlamasının önəmini qeyd edib, tibb ocağının kollektivinə uğurlar arzulayıblar.