"Lənkəran Rayon Mərkəzi Xəstəxanası" Publik Hüquqi Şəxsdə 20 Yanvar faciəsinin 32-ci il dönümünə həsr edilmiş anım tədbiri keçirilib.

Əvvəlcə faciə qurbanlarının xatirəsi bir dəqiqəlik sükutla yad edilib.

Tədbiri mərkəzin direktoru Ağabala Kəlbiyev açaraq xalqımızın yaddaşına qanla yazılmış 20 Yanvar faciəsinin müasir tariximizin ən şanlı qəhrəmanlıq səhifələrindən biri olduğunu söyləyib. Bildirib ki, ölkəmizin azadlığı və ərazi bütövlüyü uğrunda mübarizəyə qalxmış dinc əhaliyə qarşı törədilmiş bu qətliam xalqımızın mübarizə əzmini qırmadı, əksinə müstəqillik ideyası ətrafında həmrəy olmağımızda böyük rol oynadı.

Vurğulanıb ki, faciədən bir gün sonra ümummilli liderimiz Heydər Əliyev Azərbaycanın Moskvadakı daimi nümayəndəliyinə gələrək sovet rəhbərliyinin xalqımıza qarşı həyata keçirdiyi dəhşətli cinayəti kəskin pisləyən bəyanatla çıxış edib. 1994-cü il martın 29-da qəbul edilən qərarda 20 Yanvar faciəsinə ilk dəfə dövlət səviyyəsində tam siyasi-hüquqi qiymət verilib.

Tədbirdə qanlı faciənin canlı şahidləri olan həkimlər - Taleh Məmmədov, Siasət Qasımov və Zair Axundov həmin ağrılı-acılı günləri xatırlayıblar. Bildirilib ki, 20 Yanvar Azərbaycanın tarixinə təkcə bir faciə günü kimi deyil, həm də xalqımızın istiqlaliyyət əzminin, sarsılmaz iradəsinin sübutu, dövlət müstəqilliyinin bərpa edilməsinə doğru aparan yol, milli qürur doğuran bir gün kimi həkk olunub.