"Qazax Müalicə Diaqnostika Mərkəzi" Publik Hüquqi Şəxsdə 20 Yanvar - Ümumxalq Hüzn Gününə həsr olunmuş tədbir keçirilib.

Əvvəlcə 20 Yanvar şəhidlərinin və Azərbaycanın suverenliyi, ərazi bütövlüyü uğrunda şəhid olan həmvətənlərimizin əziz xatirəsi bir dəqiqəlik sükutla yad edilib.

Tədbirdə müəssisənin direktoru Kamandar İbrahimov 20 Yanvar faciəsindən danışıb, keçmiş sovet imperiyası ordusunun 1990-cı il yanvarın 19-dan 20-nə keçən gecə Azərbaycanda qanlı hadisələr törətdiyini söyləyib. Qeyd edib ki, o qanlı gecə heç vaxt xalqımızın yaddaşından silinməyəcək.

K.İbrahimov faciədən dərhal sonra – 1990-cı il yanvarın 21-də ümummilli lider Heydər Əliyevin ailə üzvləri ilə birlikdə Azərbaycanın Moskvadakı daimi nümayəndəliyinə gedərək mətbuat konfransı keçirtdiyini, Bakıda törədilən qırğınların günahkarlarının cəzalandırılmasını tələb etdiyini xatırladıb. O, müstəqillik yolunun məhz 20 Yanvardan başlandığını, Qanlı Yanvar faciəsinə hüquqi-siyasi qiymətin məhz ümummilli lider Heydər Əliyev tərəfindən verildiyini bildirib.

Qeyd olunub ki, 20 Yanvar hadisələri öz azadlığına, müstəqilliyinə can atan xalqımızın mübarizliyini, əyilməzliyini, məğrurluğunu təcəssüm etdirir. 

Tədbirdə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılmış Böyük Zəfərlə bütün şəhidlərimizin qisası alındığı vurğulanıb.