Akademik Mirəsədulla Mirqasımov adına Respublika Klinik Xəstəxanasının yüksəkixtisaslı həkim heyəti tərəfindən Naxçıvan Diaqnostika Müalicə Mərkəzində 3 günlük humanitar tibbi aksiya təşkil olunub.
Aztibb.az xəbər verir ki, aksiya çərçivəsində 1084 xəstə müayinə və müalicə olunub. Ümumilikdə, pasiyentlərə 2754 diaqnostik, terapevtik, cərrahi və digər tibbi xidmətlər göstərilib, 24 göz, 9 ümumi, 6 kiçik əməliyyat olmaqla, 39 pulsuz cərrahiyyə əməliyyatları aparılıb.
Müraciət edən pasiyentlərin hamısını tibbi xidmətlə təmin etmək məqsədilə Naxçıvan Muxtar Respublikası Səhiyyə Nazirliyi tərəfindən lazımi şərait yaradılıb. Səhhətində problem aşkar olunanlara ilkin diaqnoz qoyulub, müalicə təyin edilib, tibbi məsləhətlər verilib.
Aksiya zamanı səhiyyə maarifi işi də aparılıb, vətəndaşların sağlamlığının qorunmasında səhiyyə müəssisələri ilə birgə fəaliyyətin zəruriliyi qeyd edilib.
Qeyd edək ki, Naxçıvan Diaqnostika Müalicə Mərkəzində yanvarın 12-dən start götürən humanitar aksiyaya Respublika Klinik Xəstəxanasının 14 nəfərlik həkim heyəti dəvət olunub. Həkim heyətinin tərkibində yüksəkixtisaslı həkimlərdən pediatr, nevropatoloq, otolarinqoloq, uroloq, ümumi cərrah, ginekoloq və başqaları iştirak edib.