TƏBİB-in İdarə Heyətinin sədri vəzifəsini icra edən Vüqar Qurbanov Lənkəran rayonuna səfər edib.

İlk olaraq Vüqar Qurbanovun rəhbərlik etdiyi nümayəndə heyəti Lənkəran Regional Perinatal Mərkəzdə aparılmış işlərlə tanış olub.

Lənkəran Rayon Mərkəzi Xəstəxanasının direktoru Ağabala Kəlbiyev cənub bölgəsində yaşayan əhaliyə xidmət göstərilməsi üçün müəssisənin ən yeni avadanlıqlarla təmin edildiyini bildirib. O, əhalinin tibbi xidmətə əlçatanlığının təmin edilməsi məqsədilə ixtisaslaşdırılmış kadrların cəlb edildiyini söyləyib.

Daha sonra Mərkəzin binası ilə yaxından tanış olan Vüqar Qurbanov kollektivə tapşırıq və tövsiyələrini verib. V.Qurbanov Regional Perinatal Mərkəzin fəaliyyətə başlamasının olduqca mühüm hadisə olduğunu və Mərkəzin 9 rayonun əhalisinə xidmət göstərəcəyini bildirib. O, TƏBİB-in müvafiq şöbələri tərəfindən perinatal mərkəzlərdə çalışan həkimlərin bilik və bacarıqlarının artırılması istiqamətində müntəzəm olaraq təlimlərin keçirildiyini qeyd edib.

Məlumat üçün qeyd edək ki, Mərkəzdə ümumilikdə 76 çarpayı mövcuddur. (Doğum şöbəsi-45, Potalogiya şöbəsi-15, Anesteziologiya və Reanimasiya şöbəsi-6, Yenidoğulmuşların reanimasiya və intensiv terapiya bölməsi-10)